_edited.png)
النهاردة هنكلم عن حاجة مهمة جدا لأي حد عنده مشروع صغير أو كبير، وهي النسبة الحالية (Current Ratio). اللي عاملة زي الميزان اللي بيقولك قدرة الشركة على سداد الالتزامات قصيرة الأجل (على مدى سنة) من خلال الأصول المتداولة اللي تقدر تتحول لفلوس خلال نفس الفترة.
بس علشان نبسّط الموضوع شوية، خلينا نتخيل:
دلوقتي انتا عندك محل بقالة. و بتشتري سلع من الموردين و بتخزنها في المخزن، وبتبيعها للزبون كل يوم. هنا النسبة الحالية بتقولك قدرة المحل بتاعك على سداد الديون للموردين (الالتزامات قصيرة الأجل) من خلال الفلوس اللي عندك (الأصول المتداولة اللي تقدر تتحول لفلوس) + المخزون اللي تقدر تبيعه بسرعة (بضاعة جاهزة للبيع).
معادلة النسبة الحالية بسيطة:
النسبة الحالية = الأصول المتداولة / الالتزامات قصيرة الأجلمثال:
الأصول المتداولة = 100,000 جنيه (فلوس كاش + بضاعة جاهزة للبيع)الالتزامات قصيرة الأجل = 50,000 جنيه (ديون للموردين)النسبة الحالية = 100,000 / 50,000 = 2خلاصة الكلام، كل النسبة الحالية ما كانت أكبر كل ما الشركة أو المشروع كان عندهم سيولة أفضل وقدرة أقوي على سداد الالتزامات.
طب إزاي تحسب النسبة الحالية في الإكسل:
ببساطة، حط الأصول المتداولة في خلية و الالتزامات قصيرة الأجل في خلية تانية. بعدين اكتب معادلة النسبة الحالية في خلية ثالثة (الأصول المتداولة / الالتزامات قصيرة الأجل). و إكسل هيحسب النسبة تلقائي.
طب امتى ممكن تستخدم النسبة الحالية؟
لما تفكر تاخد قرض: البنوك بتستخدم النسبة الحالية عشان تتأكد من قدرتك على سداد القرض.
لما بتحلل المركز المالي للشركة: بتساعدك تِفهم سيولة الشركة وقدرتها على الوفاء بالتزاماتها.
لما بتقارن بين شركتين: تقدر تقارن النسبة الحالية بين شركتين منافستين عشان تشوف مين فيهم قادر اكتر على سداد الالتزامات.
النسبة الحالية تقدر تقولنا إيه؟
النسبة الحالية لو عالية: تقدر تقولنا ان الشركة عندها سيولة عالية وقدرات أعلي لزيادة الإنتاج والمخزون، و ممكن كمان تقولنا ان الشركة مش مستغلة كل مواردها بشكل كويس.
النسبة الحالية لو منخفضة: تقدر تقولنا ان الشركة عندها صعوبة في سداد الالتزامات قصيرة الأجل، وممكن تتعرض لضغوط مالية.
هل فيه حدود أو معوقات للنسبة الحالية:
مفيش نسبة حالية مثالية تنطبق على كل الشركات. النسبة المناسبة بتختلف حسب طبيعة النشاط التجاري. على سبيل المثال، شركات السوبر ماركت محتاجة نسبة حالية أعلى من شركات البترول.
و في النهاية
النسبة الحالية هي مؤشر مهم جداً عشان يساعد أصحاب المشاريع والمستثمرين يفهموا المركز المالي للشركة وقدرتها على الوفاء بالتزاماتها.بالتالي لازم تبقي فاهم كويس إن النسبة الحالية هتخليك تتحكم في مشروعك أحسن و أقوي.
Comments